ᐊᑎᖅᓯᐅᕐᓂᕐᒥᒃ ᐱᓕᕆᐊᖃᕐᓂᖅ

ᓂᐲᑦ ᓄᓇᕗᒻᒥᑦ

Personal account of Mathewsie Ashevak

ᐱᓕᕆᐊᖃᕐᓂᖅ ᐊᑎᖅᓯᐅᕐᓂᕐᒥᒃ
ᒫᑎᐅᓯ ᐋᓯᕙᐅᑉ ᑎᑎᕋᕐᓂᑯᐊ, ᕖᕗᐊᕆ 2004ᖑᑎᓪᓗᒍ

ᐅᑎᒧᑦ | ᑐᒡᓕᐊᓄᑦ

ᐱᒋᐊᖅᑳᕐᓂᐊᖅᐳᖓ ᐅᕙᓐᓂᒃ ᓇᓗᓇᐃᕐᓗᖓ, ᒫᑎᐅᓯ ᐋᓯᕙᐅᕗᖓ ᑭᙵᕐᒥᐅᖑᓪᓗᖓ ᓄᓇᕗᒻᒥ. ᖁᕕᐊᓱᒡᕕᒃᓯᐅᕆᐊᖅᓯᒪᑎᓪᓗᖓ ᐊᖏᕋᐅᔾᔨᖃᓯᐅᔾᔨᓚᐅᕋᒪ ᐊᔾᔨᖁᑎᕈᓘᔭᕐᓂᒃ ᑭᙵᕐᓄᑦ. ᐊᒥᓱᑦ ᐊᔾᔨᖁᑎᑦ ᐊᑎᖏᑦ ᐱᔪᓐᓇᖅᓯᓚᐅᕐᑕᒃᑲ ᐊᐱᖅᓱᖅᑎᓪᓗᖓ ᐊᓈᓇᑦᑎᐊᓐᓂᒃ, ᑭᓄᔪᐊᒃ ᐋᓯᕙᖕᒥᒃ, ᐊᑖᑕᑦᑎᐊᒃᓴᓐᓂᒃ, ᐸᐅᑕ ᓴᐃᓚ, ᓄᓕᐊᖓᑕᓗ ᐲᑦᑐᓘᓯ ᓴᐃᓚᐅᑉ.

ᐊᓕᐊᓐᓇᐃᑦᑎᐊᓚᐅᖅᑐᖅ ᐃᓐᓇᑐᖃᐃᑦ ᐊᔾᔨᖁᑎᑐᖃᕐᓂᑦ  --  ᓲᕐᓗ ᒪᒃᑯᖕᓂᕆᓚᐅᖅᑕᒥᖕᓂᒃ ᐅᑎᕈᑎᓚᐅᒃᑲᒃᖢᒋᑦ. ᐊᔾᔨᖁᑎᓕᒫᓄ ᑕᐅᑐᒃᑐᒻᒪᕆᐊᓘᕙᒃᖢᑎᒃ ᖁᖓᐸᔪᒃᖢᑎᒃ ᐃᓕᓴᖅᓯᐅᒪᓂᑯᒧᑦ ᐊᔾᔨᓕᐅᖅᑕᐅᓂᑯᓂᒃ ᓲᕐᓗ ᐃᑉᐸᒃᓴᓵᑯᓗᒃ ᐊᔾᔨᓕᐅᖅᑕᐅᓂᑯᑦ.

ᒫᓐᓇᒧᑦ ᑎᑭᖦᖢᒍ ᐃᓐᓇᑐᖃᕐᓄᑦ ᐅᖃᓪᓚᓗᐊᖅᐸᓚᐅᙱᒃᑲᓗᐊᕋᒪ ᐊᑐᓚᐅᖅᑕᕋ ᑖᓐᓇ ᐅᕙᓐᓄᑦ ᓄᑖᖑᔪᖅ. ᐊᓕᐊᓇᐃᒋᑦᑎᐊᓚᐅᖅᖢᒍᓗ. ᐃᓐᓇᑐᖃᐃᑦ ᐊᑦᑎᖅᓯᑐᐊᕌᖓᒥᒃ ᐊᔾᔨᖁᑎᓃᑦᑐᓂᒃ ᐅᑎᕈᒪᓂᖃᕐᔫᒥᖃᑦᑕᓚᐅᖅᐳᖓ ᖃᓄᐃᓕᖓᓂᕆᓚᐅᖅᑕᖓᓄᑦ. ᑲᒪᒋᓂᖅᐹᕆᓚᐅᖅᑕᕋ ᑐᓴᖅᖢᖓ ᐃᒻᒪᑲᓪᓚᒃ ᐊᓕᐊᓇᐃᖅᑰᔨᓂᖅᓴᐅᖃᑦᑕᓚᐅᕐᓂᖓᓂᒃ ᐃᒡᓗᖃᑦᑎᐊᙱᒃᑲᓗᐊᖅᖢᑎᒃ ᐊᖅᑯᑎᖃᑦᑎᐊᙱᐊᓗᒃᑲᓗᐊᖅᖢᑎᒡᓗ. ᐱᓱᑐᐃᓐᓇᕈᓐᓇᖅᖢᑎᒃ ᓄᓇᖅᑲᑎᒥᖕᓄᑦ. ᑕᕝᕙ ᐃᓄᑐᖃᕗᑦ ᑕᐃᒪᓐᓇ ᐃᓅᓚᐅᖅᑐᑦ ᐃᓅᓇᓱᐊᖅᖢᑎᒃ.

ᐊᑖᑕᑦᑎᐊᒃᓴᕋ, ᐸᐅᑕ ᓄᓇᖃᕐᓂᖅᐳᖅ 50ᓂᒃ ᐅᖓᓯᖕᓂᓕᖕᒥ ᐅᐊᖕᓇᖓᓐᓂᑦ ᑭᙵᐃᑦ. ᐊᑖᑕᕕᓂᐊᒎᖅ, ᓴᐃᓚ ᒪᓕᒃᑕᕆᔭᐅᕙᓚᐅᖅᐳᖅ ᑭᙵᐃᑦ ᐊᕙᓗᐊᓂᑦ ᓄᓇᓕᖕᓄᒃ. ᐊᖓᒃᑰᓐᓂᕐᒪᒡᒎᖅ ᓴᐃᓚ, ᐸᐅᑕ ᖃᐅᔨᒪᓂᖃᖤᖅᐳᖅ ᐊᖓᒃᑯᐃᑦ ᒥᒃᓵᓄᑦ. ᐸᐅᑕ ᐅᖃᐅᓯᖃᓚᐅᕆᓪᓗᓂ ᓄᓇᖃᕐᓂᑰᓂᕐᒥᓂᒃ ᓄᕋᑕᒥ. ᑲᔾᔮᕐᓇᑦᑎᐊᖅᑐᕉᖅ ᐊᒻᒪ ᐊᕐᕕᒃᓯᐅᖅᑎᕕᓃᑦ ᕿᒪᖕᓂᑯᖏᓐᓂᑦ ᓇᕝᕚᖅᑕᕐᓇᖅᖢᓂ.

ᐱᑕᓘᓯ ᐸᐅᑕᐅᑉ ᓄᓕᐊᖓ ᐃᑲᔪᖅᑐᒻᒪᕆᐊᓘᓚᐅᖅᐳᖅ ᐱᓇᓱᐊᕐᑕᑦᑎᓐᓂᑦ. 80ᐅᑉ ᐅᖓᑖᓂᑦ ᐅᑭᐅᓕᐊᓘᓕᕋᒥ ᐃᑲᔪᖅᑕᐅᔭᕆᐊᖃᖅᖢᓂ. ᑭᓯᐊᓂ ᐃᖅᑲᐅᒪᑦᑎᐊᖅᑐᖅ ᐸᐅᑕᓗ ᐅᖃᐅᓯᕆᓚᐅᖅᑕᑦᑎᖕᓂᒃ.

ᐊᓈᓇᑦᑎᐊᕋ ᐊᐱᖅᓱᖅᖢᒍ ᐊᔾᔨᖃᓚᐅᙱᓚᖅ ᐃᓐᓇᑐᖃᓕᒫᕐᓂᑦ ᐊᐱᖅᓱᖅᑕᓐᓂᒃ. ᑕᐅᑐᙳᐊᙱᑦᑎᐊᓚᐅᕋᒃᑯ 1960-ᓂᕈᔪᒃ ᐃᓅᑎᓪᓗᒋᑦ, ᑐᓴᐅᒪᓪᓗᖓᓗ ᐊᔪᕐᓇᖅᑐᖅᓯᐅᕐᓇᓚᐅᕆᐊᖓᓂᒃ ᐃᓄᖕᓄᑦ. ᑭᓇᔪᐊᒃ ᓄᓇᖃᖃᑕᐅᓐᓂᖅᐳᖅ 25ᓂᒃ ᐅᖓᓯᖕᓂᓕᖕᒥᑦ ᑭᙵᐃᑦ ᑲᓇᖕᓇᖓᓐᓂ ᐃᑎᓪᓕᐊᕐᔫᓂᕋᖅᑕᐅᔪᒥ. ᐃᓕᑕᕆᔪᓐᓇᖅᑕᓕᒫᒥᓂᒃ ᐊᑦᑎᖅᓯᓚᐅᖅᐳᖅ.

ᑕᒪᓐᓇ ᐱᓕᕆᐊᕆᔭᕗᑦ ᑐᑭᓯᕚᓪᓕᕈᑎᒋᓚᐅᖅᐸᕋ ᖃᓄᖅ ᓄᓇᕗᑦ ᐱᕈᖅᐸᓪᓕᐊᓪᓗᐊᕐᒪᖔᑦ. ᐅᔾᔨᕈᓱᖕᓂᖃᓕᓚᐅᖅᐳᓐᒐ ᐃᓐᓇᑐᖃᕗᑦ ᐱᖅᑯᓯᑐᖃᕐᒥᓂᒃ ᐊᓯᐅᔨᓯᒪᔪᐊᓘᓕᕐᓂᖏᓐᓂᒃ. ᐃᖅᑲᐅᒪᐃᓐᓇᐅᔭᕐᓂᐊᓕᖅᖢᖓᓗ ᐊᔪᕐᓇᖅᑐᖅᓯᐅᕐᓂᒃᑯᑦ ᐊᓂᒍᐃᔪᓐᓇᕐᓂᖅᓵᓗᓂᖏᓐᓂᒃ ᐅᕙᓐᓂᒃ. ᐃᓐᓇᑐᖃᑦ ᖁᖓᔮᖑᔮᕐᔪᒃᖢᑎᐅᖃᑦᑕᓚᐅᖅᐳᑦ ᐊᔾᔨᖁᑏᑦ ᑕᐅᑑᔮᕐᔪᒃᖢᒋᔾᔪᒃ ᓲᕐᓗ ᐅᑎᕈᔾᔭᐅᓚᐅᑲᒃᓯᒪᔪᑦ. ᐸᐅᑕ ᑕᑯᔪᓐᓇᖅᓯᓚᐅᖅᐳᖅ ᐊᑖᑕᒥᓂᒃ ᐊᒻᒪᓗ ᒪᕉᖕᓂᒃ ᓇᔭᑯᓗᖕᒥᓂᒃ. ᑭᓄᔪᐊᒃ ᐃᕐᓂᕐᒥᓂᒃ ᐅᐃᒥᓂᒡᓗ ᑕᑯᔪᓐᓇᖅᓯᓚᐅᕆᓪᓗᓂ. ᑮᓇᖏᑦ ᖁᕕᐊᓱᒃᑐᑦ ᑕᑯᓪᓗᒋᑦ ᖁᖓᔮᖃᑎᒋᑐᐃᓐᓇᓕᓚᐅᕆᕙᒃᑲ. ᖁᔭᓕᓂᖃᑦᑎᐊᖅᐳᖓ ᐱᓕᕆᖃᑕᐅᓚᐅᕐᓂᓐᓂᒃ.

ᐅᑎᒧᑦ | ᑐᒡᓕᐊᓄᑦ